Smith: Mér hefur ekki verið boðið að þjálfa Skotland

Knattspyrnustjórinn Walter Smith hjá Rangers og fyrrum landsliðsþjálfari Skotlands ítrekar í viðtali við breska fjölmiðla í dag að hann hafi ekki verið í viðræðum við skoska knattspyrnusambandið um landsliðsþjálfarastöðuna hjá Skotlandi.

Smith kveðst heldur ekki hafa áhuga á starfinu sem hann hætti sjálfur í á meðan á undankeppni EM 2008 stóð.

„Í ljósi sögusagna í fjölmiðlum undanfarið þá vill ég bara taka það fram að enginn hjá skoska knattspyrnusambandinu hefur rætt við mig. Það er heldur ekki inni í myndinni hjá mér að fara í slíkar viðræður.

Ég tók ákvörðun um að hætta sem landsliðsþjálfari á sínum tíma og það var erfið ákvörðun fyrir mig því ég naut þess að vera landsliðsþjálfari Skotlands.

Sú ákvörðun gerir það hins vegar að verkum að mínu mati að það er ekki sniðugt fyrir mig að snúa aftur í þetta starf," er haft eftir Smith en skoska landsliðið hækkaði sig um sjötíu sæti á heimslista alþjóðaknattspyrnusambandsins FIFA á meðan hann var við stjórnvölin.