Lohan og Ronson rífast

Lindsay Lohan og plötusnúðurinn Samantha Ronson eru byrjaðar saman að nýju og segir slúðurpressan að Lindsay hafi sést með trúlofunarhring á fingri. Er dvölin ekki löng í para­dís frekar en fyrri daginn hjá stúlkunum og eru þær strax farnar að rífast að nýju.

Lindsay og Samantha hættu saman í apríl, en Lindsay sagði í þætti Ellen DeGeneres stuttu síðar að þær stöllur væru að ræða málin en hún forðaðist sambönd að svo stöddu. Hún sagðist þó elska Samönthu og vonaðist til að þær næðu saman að nýju, þegar þær væru báðar á réttum stað í lífinu til þess.

Svo virðist sem sú stund sé núna, en Lindsay og Samantha eyddu þó nokkrum tíma í eltingarleiki um helstu klúbba London, áður en þær flugu til Los Angeles saman á miðvikudaginn. Skartaði Lindsay þá glæsilegum trúlofunarhring og skrifaði á Twitter að hún „færi frá London með uppáhalds ferðafélaga sínum og kannski með frábærar fréttir í farteskinu". En fljótt skipast veður í lofti og skömmu eftir að lent var voru stelpurnar farnar að rífast að nýju, sem endaði með því að Lindsay rauk á dyr, nú án demantshringsins fína. Sama kvöld neitaði Samantha að hafa beðið Lindsay og keypt handa henni hring.

Faðir Lindsay, Michael Lohan, er hins vegar hinn bjartsýnasti og trúir því nú, þvert á fyrri skoðanir, að sambandið sé dóttur hans gott. Hann sagði breska tímaritinu Mirror að hann væri ánægður að sjá að „á meðan þær voru í London þá gerði Lindsay sitt og Samantha sitt án nokkurra vandræða. Við sjáum hvað setur."