Sprenging í vinsældum Hellisheiðarvirkjunar

Hellisheiðarvirkjun nýtur sívaxandi vinsælda meðal ferðamanna, en alls eru skráðir gestir frá upphafi árs til júlíloka liðlega 61 þúsund talsins. Það er mikil fjölgun frá því í fyrra, en þangað komu 33.500 gestir allt árið 2008.

Í morgun kom alls 21 rúta fullfermd ferðafólki, eða tæplega þúsund manns. Alls er búist við 39 rútum í dag, eða tæplega 1900 ferðamönnum.

Í tilkynningu segir að virkjunin sé orðin fastur viðkomustaður erlendra ferðamanna sem hingað koma. Auk þess leggi þangað leið sína fjöldi Íslendinga til að kynna sér jarðhitanýtinguna eða fólk sem er á leið í göngu um Hengilssvæðið, þar sem víðfeðmir göngustígar liggja.

Gestamóttaka hefur verið starfrækt í virkjuninni frá árinu 2007 og er opin frá 9 til 18 alla daga ársins. Þar er reynt að miðla og fræða gestina um vistvæna orkunýtingu Íslands á lifandi og skemmtilegan hátt.