Stjórnin reynir að þrauka

Furðu gætir innan þingliðs Samfylkingar með yfirlýsingu Ingibjargar Sólrúnar Gísladóttur utanríkisráðherra um að ríkisstjórnarsamstarfinu við Sjálfstæðisflokkinn verði haldið áfram. „Við stöndum saman meðan stætt er," sagði Ingibjörg Sólrún í fréttum Ríkisútvarpsins í gærkvöldi.

Þingmönnum Samfylkingarinnar sem Fréttablaðið ræddi við í gærkvöldi virtist brugðið yfir þessum orðum formanns síns. Í þeirra röðum var í gær gengið út frá að ályktun Samfylkingarfélagsins í Reykjavík frá kvöldinu áður yrði leiðarstef. Í henni var skorað á þingflokkinn að beita sér fyrir tafarlausum stjórnarslitum og mynda nýja stjórn fram að kosningum sem færu fram eigi síðar en í maí. Fleiri Samfylkingarfélög hafa ályktað á sömu lund.

Ingibjörg sagði í viðtalinu að ályktanirnar kæmu sér ekki á óvart. Það hefði lengi verið viðhorfið í Samfylkingunni að Sjálfstæðisflokkurinn þyrfti að axla meiri ábyrgð á því sem gerst hafi. Þá kvaðst hún ætla að beita sér fyrir vorkosningum og sagðist hafa gert Geir H. Haarde forsætisráðherra grein fyrir þeirri afstöðu sinni. Geir sagði í fyrradag að glapræði væri að kjósa í vor.

Innan þingflokks Sjálfstæðisflokksins hefur afstaðan verið sú að þjóðarhagur krefjist þess að ríkisstjórnin starfi áfram. Ef kjósa eigi á annað borð beri að gera það í fyrsta lagi í haust. Geir sagðist á Alþingi í gær sannfærður um að ríkisstjórnin væri á réttri leið í endurreisnaraðgerðum sínum.

Þingmenn Sjálfstæðisflokksins sem rætt var við eru almennt sammála Geir en þolinmæði þeirra gagnvart yfirlýsingum þingmanna samstarfsflokksins fer hratt minnkandi. Þeir telja Samfylkinguna ekki lengur nægilega trúverðuga í samstarfinu og grafa undan því fremur en styrkja.

Stjórnarsamstarfið og pólitíska ástandið verða til umræðu á fundi miðstjórnar Sjálfstæðisflokksins í dag.

- bþs, bj