Ævisaga Slumdog-stjörnu gefin út

Ákveðið hefur verið að gefa út ævisögu leikara úr Óskarsverðlaunamyndinni Slumdog Millionaire þrátt fyrir að viðkomandi sé einungis níu ára. Um er að ræða Rubina Ali sem fór á kostum sem hin unga Latika.

Kvikmyndin Slumdog Millionaire sló í gegn og sópaði til sín fjölda verðlauna. Þar á meðal hlaut myndin átta Óskarsverðlaun.

Leikstjórinn Danny Boyle hefur legið undir ámælum fyrir að hafa svikið munaðarlausu börnin sem léku í myndinni og sumir hafa jafnvel gengið svo langt að kalla Boyle þrælahaldara. Boyle hélt þó nýverið til Indlands til að finna sómasamleg heimili handa stjörnum úr myndinni, þar á meðal Ali.

Það er breska útgáfufyrirtækið Transworld sem gefur bókina út. Stefnt er að bókin komi út síðar í sumar.