Stórtækir innbrotsþjófar handteknir

Lögreglan á höfuðborgarsvæðinu handtók í fyrrakvöld þrjá menn af erlendum uppruna grunaða um að hafa brotist inn í hús í miðborg Reykjavíkur. Í framhaldi af handtöku mannanna voru gerðar húsleitir og fannst í þeim töluvert magn skartgripa, tölvubúnaðar, myndavéla og fleira. Búið er að tengja hluta þessara muna við innbrot í heimahús á höfuðborgarsvæðinu. Það var ábending frá árvökulum borgara sem leiddi til þessarar handtöku.

Í gær handtók lögreglan svo karl og konu af erlendum uppruna sem reynt höfðu að koma stolnum skartgripum í verð á höfuðborgarsvæðinu, eftir ábendingu frá borgara. Í framhaldi af handtökunni var farið í húsleitir þar sem talsvert magn þýfis fannst. Það hefur verið tengt við nokkur innbrot í heimahús á höfuðborgarsvæðinu.

Samkvæmt upplýsingum frá lögreglunni tengjast þeir sem handteknir voru í fyrrakvöld og í gær innbyrðis. Fjórir hinna handteknu hafa verið úrskurðaðir í gæsluvarðhald til 21. ágúst næstkomandi en sá fimmti var vistaður á Stuðlum vegna ungs aldurs.