Vilja vegarspotta strax vegna klúðurs

Stysta leiðin milli byggðarlaganna liggur um Öxarfjarðarheiði en hún er aðeins fær yfir sumarið og lokast í fyrstu snjóum á haustin. Fyrir tveimur árum var byrjað að leggja nýjan veg, þrjátíu kílómetra langan, um Hólaheiði, þrátt fyrir að bóndi á bænum Brekku við Kópasker sætti sig ekki við að fá veginn um sitt land enda hugðist Vegagerðin ná sínu fram með eignarnámi. Bóndinn vann hins vegar málið í Hæstarétti í vor og nú situr Vegagerðin uppi með nær tilbúinn veg, nema það vantar síðustu tvo kílómetrana næst Kópaskeri.

Til að bjarga þessu klúðri, sem sveitarstjóri Langanesbyggðar kallar svo, freistar Vegagerðin þess nú fá að fá að leggja veginn um land Katastaða og vill fá að sleppa umhverfismati fyrir síðasta spottann, til að verkið tefjist ekki um heilt ár.

Málið brennur á íbúum við Öxarfjörð og Þistilfjörð og í gær sendi sveitarstjórn Langanesbyggðar frá sér yfirlýsingu þar sem gerð er sú krafa til Alþingis og ráðamanna þjóðarinnar að umhverfisráðherra ásamt Vegagerðinni beiti sér fyrir því að nýi vegurinn verði kláraður strax í haust. Siggeir Stefánsson, oddviti Langanesbyggðar, kveðst hugsa með hryllingi til þess ef íbúar svæðsins þurfa að búa við núverandi vegi eitt ár í viðbót.