Óvíst að Reykvíkingar fái mjólk á morgun

Bilun kom upp í dag í stjórnbúnaði sem stýrir framleiðslu á mjólk hjá Mjólkursamsölunni í Reykjavík. Samkvæmt upplýsingum frá Mjólkursamsölunni fór næg mjólk til dreifingar í dag, því áður en bilunin varð, var dreifingu lokið á allri þeirri mjólk sem verslanir og viðskiptavinir MS í Reykjavík og nágrenni áttu von á í dag. Viðgerð er hraðað sem auðið er en ljóst er að röskun verður á afgreiðslu og dreifingu á mjólk á morgun föstudag.

Samkvæmt upplýsingum frá Mjólkursamsölunni verður mjólk sem framleidd er hjá MS Selfossi og Akureyri flutt til Reykjavíkur í nótt og henni dreift á morgun. Engu að síður mun þetta hafa áhrif á framboð á mjólk og seinkun verður á afgreiðslu frá Mjólkursamsölunni í Reykjavík á morgun.