Wenger má vinna eins lengi og hann vill

Ivan Gazidis, nýr framkvæmdastjóri Arsenal, segir að Arsene Wenger muni halda starfi sínu hjá Arsenal eins lengi og hann sjálfur vill.

Wenger hefur náð frábærum árangri með Arsenal síðan hann tók við liðinu árið 1996, en liðið hefur reyndar ekki unnið bikar síðan árið 2005 þegar liðið vann sigur í ensku bikarkeppninni.

Sú staðreynd hefur fengið marga til að velta því fyrir sér hvort komið sé gott hjá franska stjóranum, en forráðamenn Arsenal eru ekki á því að láta hann fara.

"Ég vil að Arsene verði hér svo lengi sem hann hefur hungur til þess og ég sé ekki að það sé að minnka," sagði Gazidis í samtali við People. "Hann trúir á það sem við erum að gera og er að byggja upp frábært lið ungra leikmanna. Ég er viss um að hann hefur áhuga á að fylgja því eftir," sagði framkvæmdastjórinn.