Aron Einar skoraði fyrir Coventry

Aron Einar Gunnarsson skoraði mark Coventry sem gerði 1-1 jafntefli við Crystal Palace á útivelli í ensku B-deildinni í kvöld.

Markið skoraði hann á 31. mínútu með skalla eftir fyrirgjöf frá hægri. Aron fékk svo annað gott færi í síðari hálfleik er hann var sloppinn í gegnum vörn Crystal Palace en skaut yfir markið.

Kieron Cadogan jafnaði svo metin fyrir heimamenn á 72. mínútu.

Tveir aðrir leikir fóru fram í deildinni í kvöld. Watford og Southampton gerðu 2-2 jafntefli og þá vann Sheffield United 2-1 sigur á Barnsley.

Coventry er í fjórtánda sæti deildarinnar með 52 stig.