Hollendingar urðu að sleppa sjóræningjum

Hollenskir sjóliðar sem handtóku sjö sómalska sjóræningja í dag þegar þeir reyndu að ræna skipi, hafa orðið að láta þá lausa. Lögum samkvæmt voru hollensku sjóliðarnir í órétti.

Þegar grískt olíuflutningaskip sendi út neyðarkall í dag hraðaði hollenskur tundurspillir sér á vettvang. Sómölsku sjóræningjarnir höfðu þá skotið á skipið en ekki komist um borð.

Þegar tundurspillirinn kom á vettvang flúðu sjóræningjarnir á árásarbátum sínum um borð í móðurskip.

Hollenskir sjóliðar eltu þá á hraðbátum og sjóræningjarnir gáfust upp. Það kom í ljós að sjóræningjarnir höfðu einnig rænt móðurskipinu sem var fiskiskip frá Jemen með tuttugu manna áhöfn.

Hollendingar frelsuðu fiskimennina og skip þeirra. Hinsvegar urðu þeir að leyfa sjóræningjunum að fara á árásarbátum sínum.

Samkvæmt hollenskum lögum mega þeir aðeins handtaka sjóræningja ef þeir eru frá Hollandi, ef fórnarlömb þeirra eru frá Hollandi eða ef þeir eru teknir í hollenskri landhelgi.

Sjóræningjarnir sigldu því glaðbeittir á brott í leit að nýju skipi til að ræna.