Arsenal búið að staðfesta Arshavin

Þá er það loksins orðið staðfest. Andrei Arshavin er orðinn leikmaður Arsenal en þessi 27 ára rússneski landsliðsmaður kemur frá Zenit í Pétursborg.

Arsenal hefur staðfest kaupin á heimasíðu sinni. Arshavin mun nú ganga frá persónulegum málum í Rússlandi og undirbúa flutning sinn til Lundúna.

Hann gæti spilað sinn fyrsta leik í búningi Arsenal í nágrannaslag gegn Tottenham á sunnudag en þar sem tímabilinu í Rússlandi lauk í nóvember er líklegt að hann fái aðeins meiri tíma til að undirbúa sig.

Hann verður ekki löglegur með Arsenal í Meistaradeildinni þetta tímabilið þar sem hann hefur þegar leikið með Zenit í keppninni.