Stendur ekki til að loka Þjóðleikhúsinu

Tinna Gunnlaugsdóttir þjóðleikhússtjóri segir ekki standa til að loka Þjóðleikhúsinu enda sé engin þörf á því. Viðgerðum á húsinu sé lokið og leikhúsið skarti sínu fegursta sem leikhús. Hún segir húsið virka fullkomlega þó til standi að byggja við og tæknivæða leikhúsið enn frekar. Tinna segir miklar viðgerðir hafa staðið yfir undanfarin ár en í þær hafi verið ráðist eftir skýrslu sem var unnin um ástand hússins.

Fréttablaðið birtir frétt í morgun þar sem vitnað er í umrædda skýrslu. Það eru sérfræðingar frá þýska fyrirtækinu Gerling+Arendt Planungsgesellschaft sem skiluðu skýrslunni í ágúst árið 2006. Skýrsluhöfundar segja ástandið svo slæmt að loka þyrfti leikhúsinu í tvö ár til þess að ráðast í milljarðaendurbætur.

Í skýrslunni eru gerðar alvarlegar athugasemdir við nánast allt sem við kemur ástandi og aðbúnaði leikhússins. Meðal annars kemur fram að leikhúsið uppfylli ekki alþjóðlega öryggisstaðla, brunavarnir séu hreinlega ekki til staðar og að vinnuaðstaðan þverbrjóti gegn lögum um vinnuvernd. Þetta sé vegna þess að þeir staðlar sem fylgt var þegar húsið var byggt árið 1950 séu löngu orðnir úreltir.

Tinna segir skýrsluna vera frá árinu 2005 en henni hafi verið skilað í skýrsluformi árið 2006.

„Eins og þjóðin veit þá hafa staðið yfir viðamiklar viðgerðir á nákvæmlega þeim atriðum sem getið er um undanfarið. Má þar nefna múrvinnu, viðgerð á burðarvirki, leka í gluggum auk víðtækra aðgerða um öryggis- og brunamál auk bættara aðgengis fyrir hreyfihamlaða," segir Tinna.

Hún segir þó að Þjóðleikhúsið hafi sætt vanrækslu í áratugi. Þegar hún hafi tekið við sem leikhússtjóri hafi ástandið verið slæmt vegna leka og ástand ytra byrðis hafi verið slæmt auk þess sem vinnuaðstæður hafi verið taldar hættulegar. Samstaða hafi þó náðst í ríkisstjórn um fjármagn til þess að kippa þessu í liðinn. Þeim viðgerðarfasa sé nú lokið.

„Hinsvegar er enn eftir að endurbæta alla tækni í húsinu og viðbygging til austurs er enn eftir. Það myndi breyta allri aðstöðu í húsinu því þá myndi bætast við hliðarsvið og geymslur sem sárvantar. Ég hef lagt mig fram við að koma því máli á einhverskonar verkefnaskrá þó ég viti og skilji vel að nú þurfi að velja vel þær framkvæmdir sem farið er í. Þetta er hinsvegar ekki eitthvað sem er svo brýnt að ekki sé hægt að starfa við þær aðstæður sem nú eru," segir Tinna.