United skuldar 200 milljarða

Fjármálasérfræðingur segir að eigendur Manchester United séu í mjög vondum málum ef þeir ná ekki að endurfjármagna gríðarlegar skuldir sínar.

Í breska blaðinu News of the World í dag kemur fram að skuldir Glazer-feðga tengdar United nemi um 200 milljörðum króna.

Til greina komi að félagið þurfi að selja leikmenn til að standa í skilum með lán Bandaríkjamannanna, eða hreinlega selja klúbbinn.

Sagt er að Glazer-feðgar þurfi að borga 14 milljarða af láni sínu árið 2013, 28 milljarða árin 2014, 2015 og 2016 og svo eina risaborgun árið 2017 sem hljóðar upp á yfir 110 milljarða króna.

"Í fyrsta skipti er komið í ljós hve gríðarlega þung greiðslubyrði félagsins er næstu níu árin. Glazer-feðgar munu auðvitað reyna að endurfjármagna að einhverju leyti, en það á ekki eftir að reynast auðvelt í ljósi aðstæðna í kreppunni. Því gæti félagið þurft að fjármagna það með sölu á leikmönnum eins og Ronaldo þvert á vilja knattspyrnustjórans. Einnig gætu þeir auðvitað selt félagið á hátt í 200 milljarða, sem gæfi þeim smá hagnað á öllu saman," sagði talsmaður News of the World.

Stuðningsmannafélög Manchester United hafa fylgst vel með skuldastöðu félagsins síðan Glazer-feðgar greiddu 150 milljarða fyrir félagið á núvirði árið 2005.

Yfirtaka Bandaríkjamannanna var fjármögnuð af stærstum hluta með lánum og þau standa nú í um 130 milljörðum króna. Þar af eru um 100 milljarðar af þeim peningum með veði í félaginu sjálfu og eignum þess.

Velta United hefur aukist mikið á síðustu árum og hagnaðurinn verið ágætur sömuleiðis, en hann ku allur hafa þurrkast út og meira til vegna svimandi hárra vaxta sem Glazer-feðgar þurfa að greiða af lánum sínum.