Ólafur: Sáttur við þrjú stig á móti erfiðum andstæðingi

Ólafur Kristjánsson, þjálfari Breiðabliks, var ánægður með 2-1 sigur á Þrótti enda liðið búið að gera betur en undanfarin tvö sumur þegar liðið náði aðeins jafntefli í sínum fyrtsa leik.

„Það er ánægjulegt að fá þrjú stig í fyrsta leik. Ég er sáttur við að fá þrjú stig í fyrsta leik á móti erfiðum andstæðingi sem við vorum í ströggli með í fyrra. Þeir eru vel skipulagðir og líkamlega sterkir. Ég kvarta ekki yfir þessum úrslitum," sagði Ólafur.

Blikar gáfu mikið eftir í seinni hálfeik en stóðust áhlaup Þróttara. „Fótbolti gengur út á það að sækja og verjast. Við vörðumst vel í seinni hálfleik en sóttum ekki eins vel. Við sóttum vel og vörðumst vel í fyrri hálfleik. Tveir hlutir í leiknum voru í góðu lagi í fyrri hálfleik og annar hlutinn var betri en hinn í seinni hálfleik þannig að við fáum þrjá af fjórum," sagði Ólafur spekingslegur.

Það fór örugglega um suma leikmenn Blika þegar Þróttur minnkaði muninn í 2-1 eftir aðeins 30 sekúndur í seinni hálfleik.

„Þú ferð og talar við liðið þitt og leggur eitthvað upp fyrir seinni hálfleikinn. Mark eftir 30 sekúndur breytti í sjálfu sér ekki okkar plönum en auðvitað vorum við svolítið óöruggir. Við vorum undir fyrstu fimmtán mínúturnar en svo jafnast þetta aðeins. Mér fannst við standast áhlaupið ágætlega.

Kristinn Steindórsson og Alfreð Finnbogason skoruðu báðir flott mörk í leiknum og þar gætu leynst markaskorarar liðsins í sumar. „Það er eitt að skora mörk í 2. flokki og annað að skora mörk í meistaraflokki. Þeir nýttu sín færi vel í dag og skoruðu mjög góð mörk. Ég er mjög ánægður með þá," sagði Ólafur.

Ólafur tefldi Arnóri Sveini Aðalsteinssyni fram á miðjunni í forföllum Guðmundar Kristjánssonar, sem tók út leikbann.

„Arnór getur spilað allstaðar á vellinum, hægri bakvörður, vinstri bakvörður eða hafsent. Hann getur spilað hvar sem er og leysti þessa stöðu frábærlega í dag.

Hann leggur upp annað markið og er mjög hreyfanlegur en síðan sjáum við bara til hvernig við púslum þessu í næsta leik. Guðmundur kemur þá úr banni og kemur kannski inn og kannski ekki," sagði Ólafur.

Næsti leikur Blika er út í Eyjum og segir Ólafur þessi sigur hjálpa upp á sjálfstraustið en einnig gefa vísbendingar um hvar liðið hans þarf að bæta sig.

„Það er alltaf erfitt að fara út í Eyjar en það er ekki ómögulegt að ná í stig þar og við ætlum að undirbúa okkur vel fyrir þann leik," sagði Ólafur.