Fimm leikmenn kærðir fyrir veðmálabrask

Fimm leikmenn sem léku í ensku D-deildinni hafa verið kærðir fyrir veðmálabrask af enska knattspyrnusambandinu.

Um er að ræða fjóra leikmenn sem léku áður með Accrington og einn með Bury. Þeir veðjuðu allir á að Bury myndi bera sigur úr býtum í leik liðanna í síðustu umferð deildarinnar síðastliðið tímabil.

Bury vann leikinn, 2-0, og léku tveir fimmmenninganna í leiknum - þeir Jay Harris og Peter Cavanagh, leikmenn Accrington.

Fjórir þeirra veðjuðu minnst fyrir þúsund pund og mest fyrir fjögur þúsund pund. Sá fimmti - Peter Cavanagh - þó ekki nema fimm pund.

Harris hefur einnig verið kærður fyrir veðmálabrask hjá sínu nýja félagi en hann leikur nú með Chester.

Leikmönnum, þjálfurum og öðrum starfsmönnum knattspyrnuliða er bannað að veðja á knattspyrnuleiki af enska knattspyrnusambandinu.