Ólafur: Munar um hvern mann

Ólafur Jóhannesson landsliðsþjálfari segir það slæmt að missa reynslumikla menn úr íslenska landsliðinu fyrir leikinn mikilvæga gegn Skotum í næstu viku.

Þeir Birkir Már Sævarsson og Heiðar Helguson hafa neyðst til að draga sig úr hópnum vegna meiðsla og þá er nánast öruggt að Brynjar Björn Gunnarsson verði ekki með.

„Það eru 99 prósent líkur á því að hann verði ekki með. Það er sérstaklega slæmt að missa hann og Heiðar því þeir búa yfir mikilli reynslu úr enska boltanum og við erum að fara mæta liði sem spilar samskonar knattspyrnu."

„Svo er Birkir afar traustur leikmaður og einn af fáum sem hafa þann hraða sem til þarf."

„En flóran af góðum leikmönnum er ekki stór og munar um hvern mann sem við missum."

Hann segist þó treysta þeim leikmönnum sem koma inn í þeirra stað fyllilega til að takast á við það verkefni sem er framundan.

„Við verðum ellefu inn á vellinum - það hefur ekkert breyst," sagði Ólafur. „Það koma aðrir leikmenn inn og þeim er algerlega treystandi þrátt fyrir að þeir búi ekki yfir jafn mikilli reynslu og hinir. Það var vitað að þeir þurftu einhvern tímann að takast á við stór og mikil verkefn og þeir munu því öðlast dýrmæta reynslu í þessum leik nú."

Ólafur valdi þá Ármann Smára Björnsson og Birki Bjarnason í landsliðið í stað þeirra Heiðars og Birkis Más.

„Það er hægt að nota Ármann á marga vegu. Hann er sterkur í loftinu og getur spilað sem „target-center" ef á því þarf að halda."

„Birkir var sá eini af þeim ungu leikmönnum sem við höfðum ekki kíkt á. Það var því kjörið að taka hann inn nú."

„Hann hefur verið fastamaður með Viking í Noregi nú í upphafi tímabilsins sem veit á gott. Ég sá hann líka spila í Noregi í fyrra og einnig með U-21 landsliðinu. Mér leist vel á hann í báðum þessum leikjum."

Ólafur segist ekki hafa fengið frekari fregnir um meiðslavandræði á leikmönnum íslenska landsliðsins.

„Emil (Hallfreðsson) er kominn til landsins og hefur farið til sjúkraþjálfara. Hann lítur vel út."