Fletcher: Það er ekki nóg að tala

Miðjumaðurinn Darren Fletcher hjá Manchester United segir að liðið hefði kosið að sleppa við að fara beint í landsleikjahlé í kjölfar tveggja tapleikja í úrvalsdeildinni.

United hafði verið á mikilli siglingu í deildinni og var komið í kjörstöðu til að tryggja sér titilinn, en tvö slæm töp í röð gegn Liverpool og Fulham hafa opnað titilbaráttuna upp á gátt á ný.

"Það hefði verið best að fá leik strax til að rétta úr kútnum eftir þessi töp. Það er auðvelt að sitja hérna og tala um það, en það eina sem við getum gert er að fara út á völlinn og sanna að þetta hafi aðeins verið smá dýfa hjá okkur," sagði Fletcher.

"Það hefði verið fínt að sleppa við landsleikjahlé á þessum tímapunkti, en ég er líka viss um að Liverpool hefði kosið að sleppa við það. Ég er viss um að við komumst aftur á sigurbraut," sagði Fletcher.