Middlesbrough ekki til sölu

Steve Gibson, stjórnarformaður Middlesbrough, segir það rangt að hann sé að íhuga að selja félagið eftir að það féll úr ensku úrvalsdeildinni nú í vor.

Þessu var haldið fram í enskum fjölmiðlum í gær og hefur félagið nú gefið út yfirlýsingu þar sem því er neitað.

„Félagið er ekki til sölu. Ég hef skuldbundið mig félaginu og það eina sem ég einbeit mér að nú er að félagið komi sér aftur upp í úrvalsdeildinni," sagði Gibson í yfirlýsingunni.

„Stuðningsmenn félagsins geta hunsað þennan fáránlega fréttaflutning. Ég hef áður gert öllum ljóst að ég ætla ekki að selja félagið og því hefur það valdið mér miklum vonbrigðum að dagblað sem kemur út á landsvísu geti birt þessa frétt án þess að ræða við mig fyrst."