Taka undir með íbúum á Kjalarnesi

Borgarráð tekur undir með íbúum á Kjalarnesi um að brýnt sé að fara í nauðsynlegar úrbætur á Vesturlandsvegi og mikilvægi þess að umferðaröryggismál verði betur tryggð fyrir akandi og gangandi vegfarendur við þessa fjölförnu umferðaræð. Þetta kemur fram í frétt á vef Reykjavíkurborgar. Vísir sagði frá áhyggjum íbúa á Kjalarnesi í morgun en litlu munaði að stórslys yrði á veginum þegar tveir ungr piltar urðu næstum undir flutningabíl þar í síðustu viku.

„Borgarráð ítrekar mikilvægi þess að hraðað verði framkvæmdum við Vesturlandsveg til að auka umferðaröryggi á veginum Borgarráð samþykkti á fundi sínum í dag bókun vegna umferðarmála við Kjalarnes: Borgarráð ítrekar mikilvægi þess að Vegagerð ríkisins hraði framkvæmdum við Vesturlandsveg til að auka umferðaröryggi á veginum," segir í fréttinni.

Þá segir einnig að vegagerð ríkisins sé veghaldari þjóðvegarins og beri ábyrgð á framkvæmdum við hann. Lögð sé áhersla á að vinnu við gerð undirganga undir þjóðveginn á móts við Fólkvang verði hraðað og aðrar ráðstafanir verði gerðar til að tryggja öryggi gagnvart umferð á veginum.

„Ennfremur mun Reykjavíkurborg beita sér fyrir því að eftirlit með umferðarhraða, samhliða hraðahindrandi aðgerðum, verði aukið í samráði við Lögregluna á höfuðborgarsvæðinu."