Fimm milljarðar eru ekki nóg fyrir Forlan

Forseti Atletico Madrid segir að Manchester City verði að bjóða betur en fimm milljarða króna ef félagið ætli sér að kaupa framherjann Diego Forlan í sumar.

Sagt er að City hafi mikinn hug á að landa Forlan og spænskir miðlar fullyrða að enska félagið hafi þegar boðið um fimm milljarða króna í hann. Hvort sem það er rétt eða ekki - vill forseti spænska félagsins fá meira fyrir hann.

"Þeir verða ða bjóða hærra ef þeir vilja Forlan," var haft eftir forsetanum í Marca. "Blaðamaður frá Úrúgvæ hringdi í mig fyrir skömmu og hann hafði eftir Forlan að honum liði vel hjá Atletico. Um leið og eitthvað verður að frétta af honum eða Sergio Aguero, mun ég greina frá því," sagði forsetinn.

Undrabarnið Aguero hefur verið orðaður við Inter á Ítalíu.