Samfélagið hefur liðið fyrir pólitísk átök

Forseti Íslands segir að íslenskt samfélag hafa liðið fyrir átök og atburði á undanförnum dögum sem sé ný reynsla fyrir þjóðina og geti stefnt þeirri samfélagslegu sáttargjörð og friðsemd sem hafi verið stolt Íslendinga í alþjóðasamfélaginu í verulega hættu. Enginn viti hvert það samfélag stefni ef þróun sem þessi haldi áfram.

Á rúmlega tólf ára forsetatíð Ólafs Ragnars Grímssonar hefur þjóðin aldrei séð forsetann þurfa að beita sér með eins afgerandi hætti við stjórnarmyndun og önnur eins átök í samfélaginu og nú ríkir. Frá því Ólafur Ragnar var kosinn forseti hefur leiðtogum stjórnmálaflokkanna á Alþingi reynst tiltölulega auðvelt að mynda þar meirihluta án þess að forseti kæmi þar nálægt nema með formlegum og hefðbundnum hætti. En þetta hefur ekki alltaf verið svona og fyrri forsetar þurftu oft á tíðum að leika lykilhlutverk við stjórnarmyndanir, sem gátu einnig tekið vikur og jafnvel mánuði. Það var greinilegt á máli forstans í gær að hann hefur áhyggjur af þeim óvenjulegu aðstæðum sem eru uppi á Íslandi um þessar mundir.

Stjórnarmyndunarviðræður hafa oft gengið svo illa að forseti hafi verið tilbúinn með utanþingsstjórn. Þannig var það eitt sinn í tíð Kristjáns Eldjárns, sem var hársbreidd frá því að mynda slíka stjórn á sínum tíma. Ólafur Ragnar útilokaði í gær ekki þennan kost ef ekki leiðtogum stjórnmálaflokkanna tekst ekki að koma fljótt saman stjórn.