Arsenal með góðan útisigur á Newcastle

Arsenal nældi í þrjú mikilvæg stig á St. James´s Park í dag er liðið sótti Newcastle heim. Lokatölur 1-3 fyrir Arsenal.

Markalaust var í fyrri hálfleik en Newcastle fékk kjörið tækifæri til þess að komast yfir er það fékk vítaspyrnu. Almunia varði aftur á móti spyrnu Obafemi Martins glæsilega.

Hlutirnir fóru síðan að gerast í síðari hálfleik. Nicklas Bendtner kom Arsenal yfir á 57. mínútu en Martins jafnaði leikinn mínútu síðar.

Abou Diaby skoraði svo glæsilegt mark á 64. mínútu og Samir Nasri gerði út um leikinn þrem mínútum síðar með skoti á nærstöng sem markvörður Newcastle hefði líklega átt að verja.

Staðan í ensku deildinni.