Þurfum að stíga varlega til jarðar við kyrrsetningu eigna

„Fundurinn tókst vel, en ég held að við séum að gera okkur grein fyrir því að við þurfum að stíga varlega til jarðar," segir Lilja Mósesdóttir, varaformaður efnahags- og skattanefndar.

Nefndin tók nýtt frumvarp fjármálaráðherra um kyrrsetningu eigna til umræðu á fundi sínum í morgun og fékk meðal annars Ragnar Aðalsteinsson, mannréttindalögfræðing, á sinn fund.

Í frumvarpinu, sem beinist að lögum um tekjuskatt, er kveðið á um rýmri heimildir skattrannsóknarstjóra til að kyrrsetja eignir til tryggingar greiðslu væntanlegrar skattkröfu, fésektar eða sakarkostnaðar ef hætta þykir á að eignum verði annars skotið undan eða þær glatist eða rýrni.

Lilja segir málið nú á umræðustigi. Því hafi verið velt upp hvort hugsanlega þurfi að skoða kyrrsetningu eigna heildstætt, en ekki aðeins í samhengi við tekjuskatt. Þá hafi jafnframt komið fram gagnrýni á frumvarpið fyrir að skýra ekki nógu vel ferlið að baki eignafrystingunni og hversu lengi hún má vara.

Lilja segir að þó sterk ósk sé í samfélaginu um að frysta eignir fjárglæframanna þurfi jafnframt að gæta þess að ganga ekki á rétt grunaðra.