Fékk sjokk þegar bæturnar skiluðu sér ekki

„Að stöðva svona greiðslu án neins fyrirvara er náttúrulega fáránlegt. Þú getur ímyndað þér sjokkið sem maður fær," segir Linda Magnúsdóttir, einstæð fjögurra barna móðir sem þiggur atvinnuleysisbætur.

Greiðslu bóta til hennar var frestað um síðustu mánaðamót, þar eð Linda hafði aðrar tekjur í marsmánuði samkvæmt samkeyrslu Vinnumálastofnunar við staðgreiðsluskrár Ríkisskattstjóra. Tekjurnar reyndust vera mæðralaun að upphæð 16.300 krónur, sem ekki eru frádráttarbærar. Vinkona Lindu hefur sömu sögu að segja.

„Ég var búin að plana að fara með krakkana mína upp í sumarbústað. Þegar maður lendir í svona frestun getur maður ekki greitt neina reikninga eða mat einu sinni. Maður vissi ekkert hvað maður átti að gera," segir Linda.

Hún bendir á að bæði Mæðrastyrksnefnd og Fjölskylduhjálp séu farin í sumarfrí, svo hún hafi verið farin að örvænta um hvernig hún ætti að fæða börnin sín.

Hún segist hafa átt erfitt með að ná sambandi við Vinnumálastofnun til að fá skýringar á greiðslufrestuninni. Hún er afar ósátt og bætir við að hún hafi ekki fengið neina afsökunarbeiðni eða skýringu frá stofnuninni.

Loks fékk Linda þó greitt seinnipartinn á föstudag þriðja júlí. Samkvæmt upplýsingum frá Vinnumálastofnun voru þó hundrað til tvöhundruð manns sem ekki fengu greitt fyrr en sjötta júní, tæpri viku eftir að greiðslurnar áttu að berast.

Aðspurð segist Linda telja að það hafi komið illa við marga. Sjálf sé hún í mínus í byrjun hvers mánaðar.

„Ímyndaðu þér að vera einn með fjögur börn og þurfa að greiða reikninga og eiga pening fyrir mat. Ef þú gætir ekki fætt börnin þín - hvernig myndi þér líða ef þú treystir á þessar greiðslur og missir þær án fyrirvara?" segir Linda að lokum.