Lekaholur þéttar við Sigöldu

Rekstur Sigölduvirkjunar var stöðvaður fyrr í sumar og miðlunarlón hennar, Krókslón, tæmt til að unnt yrði að ráðast í fyrsta meiriháttar viðhald á virkjuninni á 32 ára rekstrartíma hennar. Umtalsverður vatnsleki í gegnum hraun hefur frá fyrstu tíð angrað Landsvirkjunarmenn en um tíu rúmmetrar á hverri sekúndu leka undir stífluna og í gamla árfarveginn fyrir neðan. Vatnslekinn er um sjö prósent af rennsli Tungnaár og veldur tekjutapi sem áætla má allt að 200 milljónir króna á ári.

Vatnssvelgir á lóninu, þó ekki á stærð við þennan, gáfu hugmynd um hvar lekaholurnar voru og hafa menn síðustu vikur nýtt sér tæmingu lónsins til að sturta leirkenndum jarðvegi niður á lekastaðina í von um að þétta holurnar.

Og nú er komið að því að endurræsa Sigölduvirkjun á ný. Tappinn verður settur í lónið um miðja þessa viku og vélarnar gangsettar um næstu helgi og eftir það vonast menn til að náttúran komi til aðstoðar. Tungnaá flytur með sér mikinn aur sem hjálpar til að þétta jarðlögin.