Hústökufólkið yfirgaf húsið

Hópur hústökufólks sem fór í leyfisleysi inn í hús við Vatnsstíg 4 í Reykjavík í hádeginu yfirgaf húsið á fjórða tímanum eftir að lögregla gaf hópnum tækifæri á að fara úr húsinu. Ekki kom til neinna ryskinga líkt og um miðjan síðasta mánuð þegar hústökufólk kom sér fyrir í húsinu sem var rýmt fimm dögum síðar af lögreglu. Að sögn lögreglu voru á annan tug manna í húsinu að þessu sinni.

Hústökufólkið sendi frá sér yfirlýsingu þess efnis að þau væru mætt á svæðið á ný til þess að sýna samstöðu með pólsku hústökufólki en 6. maí er tileinkaður baráttu þeirra.

„Lengi vel hafa þeir sem standa að Rozbrat átt í hættu að missa húsið og nú er hættan raunveruleg. Enduropnun fríbúðarinnar er yfirlýsing. Við sýnum fólkinu í Póllandi samstöðu. Þau vilja verja heimili sitt og félagsrými frá eyðileggingu af hálfu yfirvalda. Hún er einnig yfirlýsing um staðfestu og andstöðu. Við munum ekki lúta í lægra haldi! Borgin er fyrir fólkið! Ekki kapítalíska elítu: auðjöfra, bankakakkalakka, fjárfesta og verktaka," segir í yfirlýsingu frá hópnum.

Þar segir jafnframt að fríbúðin sé staður þar sem hægt sé að þiggja veraldlega hluti. Staður þar sem allir sé velkomnir til að taka þátt og engir peningar séu í spilinu.