Van Basten er hættur með liði Ajax

Marco Van Basten er hættur sem þjálfari hollenska liðsins Ajax frá Amsterdam og mun aðstoðarþjálfari hans John van't Schip stýra liðinu út tímabilið. Van Basten tilkynnir þetta formlega á blaðamannafundi á eftir.

Van Basten sem er orðinn 44 ára gamall hefur aðeins verið þjálfari Ajax síðan í júlí 2008 eftir að hafa verið landsliðsþjálfari Hollendinga fjögur ár þar á undan.

Van Basten eyddi um 35 milljónum evra í leikmenn fyrir tímabilið en það er ljóst að liðið endar í þriðja sæti hollensku deildarinnar á eftir meisturum AZ Alkmaar og Twente Enschede. Liðið datt einnig snemma út úr bikarnum og Olympique Marseille sló Ajazx út úr sextán liða úrslitum UEFA-bikarsins.