Benayoun var á leið til Spartak í janúar

Ísraelski landsliðsmaðurinn Yossi Benayoun var búinn að samþykkja að ganga í raðir Spartak í Moskvu í janúar áður en Rafa Benitez sannfærði hann um að vera um kyrrt hjá Liverpool.

Þetta fullyrðir framkvæmdastjóri Spartak í samtali við Daily Mail í dag. "Benayoun var fyrsti kostur fyrir okkur þar sem okkur vantaði sókndjarfan miðjumann. Hann vildi koma og spila fyrir okkur en Benitez vildi á endanum ekki leyfa honum að fara," sagði Valery Karpin.

Daily Mail segir að Benitez hafi lofað Benayoun að hann fengi fleiri tækifæri með Liverpool ef hann færi ekki, en Ísraelsmaðurinn sló sem kunnugt er i gegn þegar hann skoraði sigurmark Liverpool gegn Real Madrid á Bernabeu í fyrri leik liðanna í 16-liða úrslitum Meistaradeildarinnar.