Sækir fólk heim og í vinnu

Sýslumannsembættið á Suðurlandi ætlar að gefa út handtökuskipun á 370 einstaklinga í Árnessýslu sem ekki hafa komið í fjárnám hjá sýslumanns­embættinu á Selfossi. Komi fólkið ekki af sjálfsdáðum verður það handtekið á heimilum sínum eða vinnustöðum og fært fyrir sýslumann eða fulltrúa hans.

„Þegar menn sinna ekki ítrekuðum kvaðningum um að mæta í fjárnám þá er ekki nein leið önnur en að láta lögreglu sækja menn og það erum við að gera. Við getum ekki látið málin safnast endalaust upp hjá okkur,“ segir Ólafur Helgi.

„Við munum skipuleggja þetta þannig að lögregla leiti menn uppi og færi þá á skrifstofuna til fjárnáms.“

Ólafur Helgi segir að sýslumannsembættið geri þetta af og til, síðast fyrir um einu og hálfu ári. Þá hafi orðið mikil læti og mikið skammast yfir þessu. „Þetta er einfaldlega sú aðferð sem lögin bjóða að sækja fólk til að láta það svara. Ef menn eiga engar eignir þarf að ná til þeirra þannig að þeir lýsi sjálfir yfir eignaleysi. Í sumum tilvikum gætu menn átt eignir en það verður að ljúka málinu með því að gera fjárnám með árangri eða með því að gera árangurslaust fjárnám. Það er ekki hægt að gera árangurslaust fjárnám nema ná til skuldarans eða fulltrúa hans.“

Ólafur Helgi segir að lögreglan fari inn á vinnustaði til að sækja menn en flestir skili sér sem betur fer af sjálfsdáðum í fyrstu eða annarri boðun. Hann á von á að þessu verði lokið eftir nokkrar vikur. - ghs