Tólf þúsund heimili með mjög þunga greiðslubyrði

Yfir fimm þúsund íslensk heimili skulda svo mikið að níu af hverjum tíu krónum sem heimilisfólk hefur til ráðstöfunar ættu að fara í afborganir lána. Tólf þúsund heimili eru með mjög þunga greiðslubyrði.

Þetta kom fram á fundi í Seðlabankanum í dag þar sem farið var yfir stöðu íslenskra heimila í kjölfar bankahrunsins. Hagfræðingar Seðlabanka hafa unnið að því að greina skuldastöðuna undanfarna mánuði, þetta er þriðja kynningin og nú eru í fyrsta sinni tekjur heimila komnar inn í dæmið og bílalánin sömuleiðis.

Nú er ljóst að um helmingur heimilanna borga innan við 10% af ráðstöfunartekjum sínum í afborganir af bílum. Ellefu prósent þessara heimila eru hins vegar að borga meira en 30% af ráðstöfunartekjum í afborganir af bílalánum. Miðað er við þolanleg greiðslubyrði heimilis sé innan við fjörutíu prósent. Þessi gögn sýna hins vegar að 22% heimila eru að borga meira en fjörutíu prósent - og að eitt af hverjum sex heimilum þurfa að greiða aðra hvora krónu sem kemur inn í heimilisbókhaldið eftir skatta og lífeyrisgreiðslur - í afborganir af íbúða, bíla og yfirdráttarlánum. Athygli vekur að greiðslubyrðin hjá sjö prósentum heimilanna er yfir níutíu prósent. Það þýðir að um 5200 heimili í landinu - ættu að vera greiða níu af hverjum tíu krónum sem þau hafa til ráðstöfunar í afborganir af lánum, en gera það varla, og um sex þúsund heimili eru með greiðslubyrði upp á 80% af ráðstöfunartekjum.