Umfjöllun: Þróttur vann sinn fyrsta sigur

Þróttur innbyrti sinn fyrsta sigur á Valbjarnarvelli í kvöld þegar liðið sigraði ÍBV 2-1.

Sigurinn var mjög mikilvægur fyrir Þróttara sem með sigrinum eru komnir með 5 stig en eyjamönnum mistókst að sigra þriðja leikinn í röð og eru því enn með 6 stig.

Leikurinn fór rólega af stað en fyrsta almennilega færið fengu eyjamenn þegar Andri Ólafsson átti skot að marki Þróttar en boltinn hafnaði í þverslánni ofanverðri. Matt Garner átti skömmu síðar skalla að marki Þróttar úr ágætis færi sem Sindri varði tiltölulega auðveldlega.

Töluverð barátta einkenndi fyrri hálfleikinn og liðin skiptust á að sækja en þó voru eyjamenn líklegri til að skora og voru í heildina litið töluvert sterkari aðilinn án þess þó að skapa sér nein dauðafæri.

Bæði lið voru varfærin í sínum aðgerðum og tóku litla áhættu í fyrri hálfleiknum sem þótti ekki mikið fyrir augað að mati viðstaddra.

Í seinni hálfleik lifnaði yfir leiknum og þó sérstaklega Þrótturum sem komust yfir á 64. mínútu með marki Hjartar Júlíusar Hjartarsonar sem tók boltann fallega niður og smellti honum í netið eftir góðan undirbúning frá manni leiksins, Magnúsi Má Lúðvíkssyni, lánsmanni frá KR.

Aðeins fimm mínútum síðar skoruðu Þróttarar aftur og var þar að verki Dennys Danry eftir glæsilegan undirbúning Magnúsar Más.

Eyjamenn hættu þó ekki, þeir spiluðu ágætis knattspyrnu og uppskáru mark í uppbótartíma þegar varamaðurinn Þórarinn Ingi Valdimarsson skoraði með skalla.

Sigur Þróttar var tiltölulega sanngjarn þegar upp er staðið þrátt fyrir töluverða yfirburði eyjamanna í fyrri hálfleiknum.

Mark eyjamanna kom einfaldlega of seint og flautaði Kristinn Jakobsson, góður dómari leiksins til leiksloka nokkrum sekúndum eftir markið.

Þróttur - ÍBV 2-1



Valbjarnavöllur.

Áhorfendur: óuppgefið en varla meira en 500 manns

Dómari: Kristinn Jakobsson (7)

Skot (á mark): 15-17 (5-8)

Varin skot: Sindri 7, Albert 3.

Horn: 4-5

Aukaspyrnur fengnar: 11 - 13

Rangstöður 3-3



Þróttur (4-3-3):

Sindri Snær Jensson 7

Jón Ragnar Jónsson 6

Kristinn Steinar Kristinsson 6

Kristján Ómar Björnsson 7

Birkir Pálsson 6

Hallur Hallsson (f) 7

Dennis Danry 6

Morten Smidt 5

Magnús Már Lúðvíksson 7 ML

(77. Ingvi Sveinsson)

Hjörtur Júlíus Hjartarson 7

Davíð Þór Rúnarsson 5

(72. Andrés Vilhjálmsson)



ÍBV (4-4-2):

Albert Sævarsson 5

Eiður Aron Sigurbjörnsson 5

Yngvi Magnús Borgþórsson 5

Arnór Eyvar Ólafsson 4

Matt Garner 5

Bjarni Rúnar Einarsson 6

(78 Augustine Nsumba)

Christopher Clements 5

Andri Ólafsson (f) 6

Tony Mawejje 4

( 75. Þórarinn Ingi Valdimarsson)

Ajay Leitch-Smith 5

Gauti Þorvarðarson 4

(68. Viðar Örn Kjartansson 5)