Lögreglumaður: Ekki fleiri skútumál í bráð

„Það verða ekki fréttir af smyglskútum í fjölmiðlum næstu ár,“ skrifar formaður Lögreglufélags Austurlands á vef félagsins. Til að lögregla komi upp um slík mál í framtíðinni þurfi að vera starfhæf lögregla í landinu, og stjórnvöld virðist stefna að því að svo verði ekki.

Mikið hefur verið skorið niður í fjárframlögum til lögreglu á undan­förnum árum, og hagræðingarkröfur nú koma þegar auka þyrfti verulega framlög til lögreglu, ekki draga úr þeim, skrifar Óskar Þór Guðmundsson, formaður Lögreglufélags Austurlands.

Sú sparnaðarkrafa sem nú er uppi mun leiða til enn frekari fækkunar lögreglumanna, skrifar Óskar. Það muni aftur leiða til þess að lögreglumenn verði að hætta að sinna einhverjum verkefnum. Trúlega verði hætt að sinna útköllum þegar nágrannar raski næturró, umferðar­óhöpp þar sem ekki verða slys á fólki verði ekki rannsökuð, og forvarnaverkefni verði skorin niður.

Þá er líklegt að þjófnaðarmál, innbrot og minni háttar fíkniefnabrot lendi „mjög neðarlega í bunka óunninna verka“, og að líkams­árásir þar sem meiðsl eru óveruleg verði að bíða betri tíma, skrifar Óskar. Þá þýði krafa um minni yfirvinnu að þjónusta lögreglu minnki um helgar þegar landinn skemmti sér. - bj