Englendingar í efsta styrkleikaflokki í HM-drættinum

Alþjóðaknattspyrnusambandið hefur gefið það út að enska landsliðið verður í efsta styrkleikaflokki þegar dregið verður í riðla í úrslitakeppni HM á föstudaginn.

Englendingar eru aðeins í níunda sæti á Heimslistanum en bæði Portúgal og Frakkland sem eru ofar á heimslistanum komast ekki í efsta styrkleikaflokkinn.

Önnur lönd í efsta styrkleikaflokki eru: Spánn, Brasilía, Argentína, Þýskaland, Holland, Ítalía og gestgjafarnir í Suður-Afríku. Það er ljóst að ekkert þessara landa vill lenda með Portúgal eða Frakklandi í riðli en það verður engu að síður raunin.

Það er síðan skipt í hina þrjá hópana í drættinum eftir því hvar þjóðirnar eru í heiminum. Alls verður liðunum 32 skipt niður í átta fjögurra liða riðla þar sem tvær efstu þjóðirnar komast í sextán liða úrslitin.