Hermann: Verð áfram fyrst ég er byrjaður að spila

Hermann Hreiðarsson á ekki von á öðru en að hann verði í herbúðum Portsmouth til loka tímabilsins fyrst hann er byrjaður að spila á nýjan leik eins og hann orðaði það í samtali við Vísi.

Hermann kom inn á sem varamaður í hálfleik er Portsmouth tapaði fyrir Swansea í enska bikarnum um helgina. Hann spilaði svo allan leikinn fyrir Portsmouth gegn Aston Villa í gær en Villa vann leikinn, 1-0.

„Ég hugsa að ég verði nú hérna áfram fyrst maður er byrjaður að spila," sagði Hermann.

Spurður hvort hann hafi fengið einhver viðbrögð frá Tony Adams knattspyrnustjóra eftir leik segir hann að það hafi verið óþarfi.

„Ég veit alveg hvernig ég spilaði. Þetta var fínn leikur hjá liðinu í heild og ég hef rætt við hann nógu oft um mína stöðu."

Til stóð að Hermann færi til Reading nú í janúarmánuði en Adams kom í veg fyrir það á síðustu stundu. Samningur Hermanns rennur út í lok tímabilsins en hann ætlar bara að bíða og sjá hvað verður þá.

„Þessi mánuður er búinn að vera nokkuð strembinn og ég er kominn með upp í kok á þessu öllu saman. Hvað gerist í sumar kemur bara í ljós."

Hermann sagði að úrslit leiksins í gær hefðu vitanlega verið svekkjandi.

„Við sköpuðum okkur svo sem ekki mikið af dauðafærum en einhver þó auk þess sem við fengum átján hornspyrnur í leiknum. Við hefðum gjarnan viljað fá eitthvað úr leiknum."

Portsmouth er nú í fjórtánda sæti deildarinnar með 24 stig, aðeins þremur stigum frá botnliðunum fjórum en það munar heldur ekki meira en þremur stigum á Portsmouth og Hull sem er í níunda sæti.

„Þetta eru rúmlega tíu lið sem eru í þessari baráttu og því er hver einasti leikur mikilvægur," sagði Hermann spurður um framhaldið. „Því fyrr sem við förum að klífa upp töfluna því betra. Ég tel að við höfum mannskapinn í það."

Nadir Belhadj hefur lengst af leikið sem vinstri bakvörður í haust og þannig haldið Hermanni utan liðsins. Belhadj lék hins vegar á vinstri kantinum í gær í stað Armand Traore sem var á bekknum.

Belhadj fékk hins vegar að líta rauða spjaldið í gær og má því búast við að Traore komi aftur inn í liðið í næsta leik.