Ísland mætir Íran í Teheran

Íslenska karlalandsliðið í knattspyrnu mun leika vináttulandsleik við Íran í höfuðborginni Teheran þan 10. nóvember næstkomandi.

Þetta kom fram á vefsíðu Knattspyrnusambands Íslands. Leikurinn fer fram á Azadi-vellinum en þetta er í fyrsta sinn sem þessar þjóðir mætast á knattspyrnuvellinum.

10. nóvember er að vísu ekki alþjóðlegur leikdagur en fjórum dögum síðar mætir Ísland liði Lúxemborgar í vináttulandsleik ytra.

Íran hefur verið meðal bestu knattspyrnuþjóða Asíu undanfarin misseri en liðið var aðeins tveimur stigum frá því að tryggja sér sæti í úrslitakeppni HM sem fer fram í Suður-Afríku á næsta ári.

Liðið er sem stendur í 60. sæti styrkleikalista FIFA. Íran hefur þrívegis tekið þátt í úrslitakeppni HM, síðast árið 2006. Það hefur þó aldrei komist áfram upp úr sínum riðli.

Landsliðsþjálfari Íran er Afshin Ghotbi sem er fæddur í Teheran en fluttist ungur til Bandaríkjanna. Hann tók við liðinu í apríl síðastliðnum og hefur á sínum ferli starfað sem þjálfari hjá LA Galaxy sem og kóreska landsliðinu.