Forseti Lazio fordæmir vinnubrögð United

Claudio Lotito, forseti ítalska liðsins Lazio, hefur líklega grett sig þegar hann sá fyrrum leikmann sinn Federico Macheda skora sigurmark Manchester United gegn Aston Villa í gær.

Macheda hóf feril sinn hjá Lazio á sínum tíma en félagið náði ekki að halda honum þegar Manchester United sóttist eftir að fá hann í sínar raðir árið 2007.

Lotito sakar enska félagið um vafasöm vinnubrögð við að næla sér í unga leikmenn.

"Við vissum alltaf að Mancheda væri frábær leikmaður, svo góður að við reyndum allt sem við gátum til að halda honum hérna. Við reyndum að segja Manchester United það aftur og aftur, en við gátum ekkert gert því reglurnar í þessu sambandi gera það að verkum að félög komast upp með skammarlega hluti."

"United hefur áður gert svona lagað. Þeir láta sér fátt um finnast hvað siðareglur varðar og freista foreldra með peningum og starfstilboðum," sagði forsetinn.