Torfæruhjólin fundin - eigandi stendur við fundarlaunin

Torfæruhjólin sem lýst var eftir á Vísi í morgun eru komin í leitirnar. Eigandinn stendur við fundarlaunin, en ætlar að rukka þjófana um þau seinna meir.

„Ég fékk ábendingu frá konu úr Hafnarfirði sem sagðist hafa séð hjólin í næsta húsi. Ég er á leiðinni að sækja þau," segir Valur Hermannsson, eigandi tveggja torfærumótorhjóla sem lýst var eftir á Vísi í morgun. Hjólin eru nú komin í leitirnar.

Fram kom í frétt Vísis að Valur hyggðist greiða þeim sem fyndi hjólin þrjúhundruð þúsund krónur í fundarlaun. Hann stendur við það. „Ég er með 100 þúsundkall á mér núna og ætla að redda restinni. Ég væri nú slappur ef ég myndi ekki standa við að greiða fundarlaunin," segir Valur.

Valur segir vel koma til greina að rukka þá sem stálu af honum hjólunum um þrjúhundruð þúsund krónurnar. „Þess vegna er ég ánægður að finna hjólin á undan löggunni."

Hann hrósar happi yfir því að hafa fundið hjólin. Kreppan hafi farið illa með hann og hann misst allt - nema hjólin sem eru ekkert veðsett. „Þetta hefði verið mikið tjón fyrir mig, um 900 þúsund myndi ég segja. Þetta er líka ótryggt þannig að það er eins gott að hjólin hafi komið í leitirnar."

Valur er reiður út í þjófana. „Mér finnst þetta ótrúleg vanvirðing. Ótrúlegur andskoti að menn skuli læðast um í skjóli nætur og stela eigum annarra."