Figo: Englendingar eru ekki meðal þeirra sigurstranglegustu á HM

Portúgalinn Luis Figo, fyrrum leikmaður Inter, Barcelona og Real Madrid, hefur ekki mikla trú á enska landsliðinu á HM í Suður-Afríku næsta sumar. Englendingar eru bjartsýnir fyrir keppnina eftir glæsilega undankeppni en Figo hefur mesta trú á Spáni og meiri trú á afrísku þjóðunum en Englendingum.

„Spánn, Brasilía og Argentína eru liðin sem hafa reynsluna á þessu sviði og kannski bætist Afríkuþjóð í þennan hóp þar sem að það er spilað í Afríku," sagði Luis Figo við The Mail on Sunday aðspurður um sigurstranglegustu þjóðirnar á HM í sumar.

„Ég tel að það vanti ekki mikið hjá Spánverjum. Það er aldrei til fullkomið lið en þeir eru bara að spila svo vel," bætti Figo við. Hann telur að enska landsliðið sé í sama hópi og það portúgalska þegar kemur að ákveða sigurlíkur þeirra á komandi HM.