Óbreytt frumvarp bryti mannréttindi

Ragnar Aðalsteinsson lögmaður, sem sérhæfir sig í mannréttindum, telur að ef frumvarpi um kyrrsetningu eigna verði ekki breytt kunni það að skerða mannréttindi skattborgaranna.

„Ég tel að endursemja verði frumvarpið og setja nánari skilgreiningar á því hvenær heimilt verði að beita kyrrsetningu. Að öðrum kosti kann þetta að skerða mannréttindi skattborgaranna bæði er varða reglur um að maður sé saklaus uns sekt er sönnuð og eignarréttarvernd stjórnarskrár," segir Ragnar, sem var gestur efnahags- og skattanefndar þegar frumvarpið var til umræðu í gær.

Mikið hefur verið rætt um heimild til frystingar eigna vegna rannsóknar á bankahruninu. Frumvarp liggur nú fyrir Alþingi þar sem skattrannsóknarstjóra ríkisins verður heimilt að kyrrsetja eigur aðila sem eru til rannsóknar hjá embættinu. Efnahags- og skattanefnd er með málið til umfjöllunar og ásamt Ragnari komu ASÍ, SA og Samtök fjármálafyrirtækja á fund nefndarinnar í gær.

Brynjar Níelsson lögmaður telur að frumvarpið sé allt of víðtækt og í raun óþarfi. Í lögum um sakamál er mælt fyrir um að lögregla geti kyrrsett eigur ef hætta þykir á að eignum verði skotið undan. „Ef það er grunur um brot getur skattrannsóknarstjóri farið með málið til lögreglu og látið hana kyrrsetja eigurnar þó að rannsóknin sé áfram hjá skattinum," segir Brynjar.

Tryggvi Þór Herbertsson, fulltrúi í efnahags- og skattanefnd fyrir Sjálfstæðisflokkinn, er hræddur um að frumvarpið sé ekki nógu ígrundað og úrræðin skerði réttaröryggi og mannréttindi borgaranna. Í frumvarpinu séu yfirvöldum gefin mikil völd til að ganga að einstaklingum.

„Frumvarpið er opið leyfi fyrir stjórnvöld. Menn halda að heimildinni verði ekki misbeitt en við getum horft til Bretlands í þeim efnum. Þeir settu hryðjuverkalög sem átti bara að nota gegn hryðjuverkamönnum en svo var heimildinni beitt gegn Íslandi."

Lilja Mósesdóttir, varaformaður efnahags- og skattanefndar, segir að nefndin taki athugasemdir Ragnars alvarlega. Enn eigi réttar­farsnefnd þó eftir að koma fyrir nefndina og eftir það verði tekin ákvörðun um hvort vinna eigi frumvarpið aftur.

„Ég held að þessi gagnrýni sé réttmæt og hana þarf að taka til greina því ákveðin hætta er á því að gengið verði á rétt grunaðra sem geta reynst saklausir," segir Lilja. Því þarf að vera á hreinu hvenær sá grunaði getur andmælt, að hve miklu leyti og hversu mikið af eignum er hægt að frysta og hversu lengi, að mati Lilju.

vidir@frettabladid.is