Landsliðsferli King ekki lokið

Harry Redknapp, knattspyrnustjóri Tottenham, telur að landsliðsferli Ledley King sé ekki lokið og að hann geti gegnt mikilvægu hlutverki fyrir landsliðið í framtíðinni.

King var valinn í landsliðshópinn sem mætir Slóvakíu um helgina en yfirgaf æfingabúðir liðsins á þriðjudaginn eftir að læknar landsliðsins hefðu fengið að skoða hann.

Hann hefur lítið sem ekkert æft á milli leikja með Tottenham í vetur vegna þrálátra hnémeiðsla sem eru reyndar sögð vera krónísk.

„Ledley King ætti að vera í enska landsliðinu og spila með liðinu á HM," skrifaði Redknapp í dálki sínum í The Sun sem birtist í dag.

„Það var ekki ég sem sendi hann heim á fyrsta degi þegar landsliðið kom saman. Það voru læknar enska landsliðsins sem tóku þá ákvörðun eftir að hafa skoðað hnéð hans."

„En ég myndi gjarnan vilja að hann myndi spila með enska landsliðinu í framtíðinni og þá sérstaklega í úrslitakeppni HM. Enginn á það meira skilið en hann. Ef England kemst á HM 2010 mun ég keyra hann sjálfur til Suður-Afríku."