Fyrsti úrslitaleikur Þjóðverja og Englendinga síðan 1966

Þýskaland og England mætast í dag í úrslitaleiknum á Evrópumóti kvenna í fótbolta í Finnlandi. Þetta er fyrsti úrslitaleikur þjóðanna á stórmóti í karla- eða kvennaflokki síðan að Englendingar unnu 4-2 sigur á umdeildan hátt í framlengdum úrslitaleik heimsmeistarakeppni karla árið 1966.

Englendingar eru þarna að spila sinn fyrsta úrslitaleik á stórmóti í 25 ár eða síðan kvennaliðið komst í úrslitaleik EM 1984 þar sem liðið tapaði í vítakeppni á móti Svíþjóð.

Þýsku stelpurnar hafa hinsvegar unnið tvo Heimsmeistaratitla og fjóra Evrópumeistaratitla í röð og alls spilað níu úrslitaleiki á HM eða EM frá árinu 1989.

Enska karlalandsliðið hefur aðeins spilað einn úrslitaleik á stórmóti og það var á Wembley árið 1966 eða fyrir 43 árum. Englendingar unnu þá 4-2 sigur á Þjóðverjum eftir að staðan hafði verið 2-2 að loknum venjulegum leiktíma.

Þriðja mark Englendinga í leiknum sem kom á elleftu mínútu í framlengingunni er eitt umtalaðasta mark sem hefur verið skorað í fótboltasögunni. Geoff Hurst átti þá skot í slánna og niður og rússneski línuvörðurinn dæmdi að boltinn hefði farið inn fyrir línuna.

Það hefur aldrei fengið fullkomin sönnun þess að boltinn hafi farið inn fyrir marklínuna en flestar myndir af markinu benda til þess að svo hafi ekki verið. Hurst bætti síðan öðru marki við í framlengunni eftir skyndisókn og inngislaði þrennu sína og 4-2 sigur Englendinga.

Úrslitaleikur Þýskalands og Englendinga á EM kvenna í Finnlandi hefst klukkan 16.00 að íslenskum tíma og verður sýnt beint á RÚV.