Anders Fogh vildi ekki tjá sig um framferði Breta gegn Íslendingum

Anders Fogh Rasmussen, framkvæmdastjóri Atlantshafsbandalagsins, er staddur á Íslandi. Er þetta fyrsta heimsókn nýs framkvæmdastjóra NATO til aðildarríkis bandalagsins.

Rasmussen hélt til fundar við utanríkisráðherra í morgun og að loknum þeim fundi í Alþingishúsið. Hann mun svo funda með forsætisráðherra í hádeginu.

Rasmussen sagði á blaðamannafundi í morgun að hann hefði vissulega áhyggjur af efnahagslegum deilum milli aðildarríkja NATO, Hollands og Bretlands annars vegar og Íslands hins vegar. Hann vildi þó ekki tjá sig um aðgerðir Breta í október síðastliðnum, þegar Bretar settu Ísland á hryðjuverkalista.

Eins og fram hefur komið verða framlög til Varnarmálastofnunar skorin niður og er ætlunin að leggja stofnunina niður í núverandi mynd. Utanríkisráðuneytið segir, að niðurskurðurinn muni ekki bitna á varnar- og öryggisskuldbindingum Íslendinga.

Anders Fogh Rasmussen, segir loftrýmisgæslu hér á landi mikilvæga, en vildi ekki tjá sig um þá ákvörðun stjórnvalda að leggja Varnarmálastofnun niður í núverandi mynd. Svo lengi sem það hafi ekki áhrif á skuldbindingar Íslands sem aðildarríkis sé það ekki áhyggjuefni.