Van Persie verður ekki með gegn Villarreal

Framherjinn Robin Van Persie hjá Arsenal verður ekki með liði sínu í fyrri leiknum gegn spænska liðinu Villarreal í fjórðungsúrslitum Meistaradeildarinnar í næstu viku.

Hollendingurinn meiddist á nára þegar hann var að spila með landsliðinu og var því ekki með í 2-0 sigri Arsenal á Manchester City um helgina.

Arsenal getur þó huggað sig við að hafa endurheimt Emmanuel Adebayor úr meiðslum og hann skoraði í endurkomu sinni um helgina.

Þá hafa þeir Theo Walcott og Samir Nasri báðir fengið grænt ljós til að byrja að spila aftur eftir meiðsli.

Fyrri leikur Arsenal og Villarreal fer fram á Spáni á þriðjudaginn, en sá síðari í Lundúnum á miðvikudeginum í vikunni þar á eftir.