Benayoun: Getum keppt á tveim vígstöðvum

Ísraelinn Yossi Benayoun, sem hefur heldur betur verið drjúgur fyrir Liverpool, er hvergi banginn fyrir framhaldið og telur Liverpool vel geta gert atlögu að bæði enska meistaratitlinum sem og Meistaradeildinni.

„Það er rosaleg vika fram undan. Þetta verður svakalegur leikur gegn Chelsea og vonandi náum við að sýna svipaðan leik og í síðustu leikjum," sagði Benayoun.

„Sjálfstraustið er mjög gott hjá okkur en við verðum að taka bara einn leik fyrir í einu. Hvert tímabil er próf fyrir Liverpool. Vissulega höfum við ekki náð að keppa um enska titilinn síðustu ár en við höfum sýnt mikinn karakter í síðustu leikjum í Meistaradeildinni.

Við erum búnir að leggja bæði Real Madrid og United. Ég tel okkur hafa sannað að við getum vel keppt um báða bikarana."