Jóhann Berg: Ætlum okkur stóra hluti

Jóhann Berg Guðmundsson segir U-21 landslið Íslands ætla sér stóra hluti en liðið vann í dag 2-1 sigur á Norður-Írum.

„Það er frábært að hafa unnið þrjá leiki í röð og það er alltaf gaman að skora,“ sagði Jóhann Berg sem skoraði fyrra mark Íslands í dag. Hann skoraði einnig þrennu í 8-0 sigri Íslands á San Marino í síðustu viku.

„Þetta byrjaði reyndar frekar hægt hjá okkur en við komum sterkir inn í seinni hálfleik og náðum þá að setja tvö mörk á þá. Við vissum að þetta yrði erfiðari leikur gegn San Marínó.“

Ísland vann 6-2 sigur á Norður-Írum ytra í síðasta mánuði og Jóhann Berg sagði þá hafa verið betri í dag en í þeim leik. „Við vorum líka ekki jafn góðir og þá. En það er góð holning á liðinu. Við ætlum okkur stóra hluti og erum ekki hræddir við að lýsa því yfir.“