Gana heimsmeistari U-20 liða

Gana varð í gær heimsmeistari landsliða skipuð leikmönnum 20 ára yngri eftir sigur á Brasilíu í úrslitaleik HM sem haldið var í Egyptalandi í þetta sinn.

Staðan í leiknum var markalaus eftir venjulegan leiktíma og framlengingu og þurfti því vítaspyrnukeppni til að knýja fram úrslit.

Vítaspyrnukeppnin var hádramatísk. Brasilía komst í 3-2 en bæði lið klikkuðu á sínum spyrnu í fjórðu umferð. Þar með átti Brasilía möguleika á að tryggja sér titilinn með sinni spyrnu í fimmtu umferð.

Allt kom fyrir ekki. Maicon skaut hátt yfir og Ganamenn skoruðu úr fimmtu spyrnu sinni. Staðan var því jöfn, 3-3, og keppnin því komin í bráðabana.

Brasilíumaðurinn Alex Teixeira fór á punktinn og lét verja frá sér. Það kom því í hlut Agyemang-Badu að tryggja Gana sinn fyrsta heimsmeistaratitill í þessum aldursflokki og tókst honum það. Gana var þar með fyrsta Afríkuríkið til að vinna mótið.

Útlitið var reyndar nokkuð dökkt fyrir Gana í leiknum því skömmu fyrir hálfleik var einn leikmaður liðsins, Daniel Addo, rekinn af velli með rautt spjald.

Leikmenn Gana gerðu þó vel í sínum varnarleik í síðari hálfleik og komu í veg fyrir að Brasilíumenn næðu að skora þrátt fyrir að hafa fengið nokkur góð færi til þess.

Ungverjaland varð í þriðja sæti mótsins eftir sigur á Kosturíku í leik um þriðja sætið. Staðan að loknum venjulegum leiktíma var 1-1 en ekkert mark var skorað í framlengingunni.

Leikmönnum Kosturíku tókst ekki að skora úr einni einustu spyrnu í vítaspyrnukeppninni í fjórum tilraunum og dugði því Ungverjum að nýta tvær af sínum þremur spyrnum.