Annað kjötránið á stuttum tíma

Um tólf hundruð kílóum af kjöti hefur verið stolið frá Kjöthúsinu á Smiðjuvegi í sumar. Um 7-800 kílóum var stolið þaðan í nótt og í maí var stolið þaðan 500 kílóum.

Kristinn Jóhannesson, annar eigandi Kjöthússins, segir að vinnubrögðin hafi verið svipuð í báðum tilfellum. Hann telur að um einbeittan brotavilja sé að ræða. „Menn eru bara með slípirokka við þetta. Maður er búinn að vera að reyna efla varnirnar af því að það var farið inn í maí og þá var stolið 500 kílóum," segir Kristinn. Málið frá því í vor er enn óleyst.

Kristinn segist ekki vita hvort að kjötið sé viðurkenndur gjaldmiðill á fíkniefnamarkaðinum eða hvort um sé að ræða brotamenn sem hafi sambönd sem geri þeim kleyft að losa sig við kjötið. „Við erum búnir að vera hérna í tíu ár og okkur hefur aldrei verið boðið til sölu svona af götunni," segir Kristinn. Lögregla telur líklegt að mennirnir reyni að koma kjötinu í verð og biður fólk að vera á varðbergi gagnvart gylliboðum um hagstæð kjötkaup.