Geðlæknir segir Bjarka Frey sakhæfan

Farið er fram á sextán ára fangelsisdóm yfir Bjarka Frey Sigurgeirssyni, sem hefur játað að hafa banað manni í Hafnarfirði í sumar. Geðlæknir segir hann sakhæfan.

Bjarki hefur játað að hafa orðið Braga Friðþjófssyni að bana í herbergi sínu að Dalshrauni 15 í Hafnarfirði þann 17.ágúst síðast liðinn. Þeir höfðu setið saman að drykkju frá því um hádegi, og voru einnig undir áhrifum svokallaðra sjóveikistaflna.

Frásögn Bjarka af atburðinum er nokku gloppótt og passar illa við rannsóknargögn í málinu. Vitni segist hafa séð þá fara inn á herbergi til Bjarka um átta leytið. Í rauninni veit enginn hvað gerðist eftir það, en lögregla kom á vettvang um hálf tólf. Þá var Bjarki alblóðugur og líkið lá illa leikið inni á herbergi.

Bjarki segist einungis hafa lamið Braga með borðplötu en blóðferlasérfræðingur sem bar vitni fyrir dómi segir ljóst að vöfflujárni hafi veirð beitt í árásinni. Vitnaði hann meðal annars í breskan sérfræðing sem var sammála niðurstöðum sínum.

Ljóst er að Bjarki er illa farinn eftir áratuga neyslu fíkniefna og kom fram í máli geðlæknis sem vann ítarlega rannsókn að hann teldi Bjarka sakhæfan. Greind hans sé í slöku meðallagi og frásögn hans af atburðinum passi nokkuð við svokallað Blackout-ástand, en þá missi fólk gjarnan tímaskyn.

Langvarandi fíkniefnaneysla hafi skaðað heila hans, og hann eigi því auðvelt með að misskilja og rangtúlka hluti. Hann sagði greinilegt að Bjarki reyndi að forðast umræddan atburð, sem hjálpi honum ekki í að muna nákvæmlega hvað gerðist. Hann sé haldinn kvíða og sé í raun ekki tilbúinn til þess að mæta þessum hræðilega atburði.

Hann sagði einnig að erfitt hefði verið að fá fram sektarkennd hjá Bjarka Frey vegna morðsins.