Byrjuð að pakka niður í menntamálaráðuneytinu

Þorgerður Katrín Gunnarsdóttir fráfarandi menntamálaráðherra segist vera byrjuð að pakka niður í ráðuneyti sínu. Þar hafi ekkert farið í tætarann enda sé allt á hreinu. Þetta sagði Þorgerður í Íslandi í dag fyrir stundu. Hún sagði ljóst að enginn málefnanlegur ágreiningur hefði verið á milli ríkisstjórnarflokkanna og samstarfið hefði steytt á kröfu Samfylkingarinnar um stól forsætisráðherra. Málið snúist ekki um sína persónu. Hún óskar Jóhönnu Sigurðardóttur velfarnaðar í komandi starfi.

„Ég held að hún muni spjara sig vel og mér þykir vænt um hana Jóhönnu og ber mikla virðingu fyrir henni. Það er gott að vinna með Jóhönnu og ég hef lært mikið af henni. Hún er einstök kona og ég get ekki annað en óskað henni velfarnaðar í því viðamikla starfi sem hún er að fara að takast á við," sagði Þorgerður Katrín.

Hún vildi undirstrika að hennar persónu hefði ekki skipt neinu. Geir hefði boðist til þess að stíga til hliðar ef hans persóna og veikindi stæðu í vegi fyrir samstarfinu. „Og það er bara þannig í okkar flokki að þá tekur varaformaðurinn við og það var ég í þessu tilfelli. Það hafði ekkert að gera með að ég yrði fyrsta konan," sagði Þorgerður og bætti því við að það væri síðan eftirá skýring að samband hennar og Ingibjargar væri ekki gott.

„Samband okkar hefur verið með ágætum og mér er hlýtt til hennar. Ég vona að henni farnist vel í sínum veikindum því það skiptir miklu máli að hún nái sér."

Þorgerður sagðist ennþá vera að íhuga hvort hún muni bjóða sig fram til formanns á landsfundi Sjálfstæðisflokksins. Hún sagði mikið líf í flokknum og evrópuumræðan hefði kveikt í fólki. „Það er aðeins verið að hrista upp í okkur núna og við verðum að horfa til fortíðar, læra af henni og horfast í augu við það sem við höfum gert."